بدك الصراحة ..؟!!

[خليل صارم]

* بدك الصراحة.


- شووووو ..!!


* ليش استغربت أنا عم قول بدك الصراحة .؟


- شو هيدي صراحة ماصراحة .. عم تشتغل بالتهريب .؟!!


* ولك شو قصتك يارجل .. ماعملنا شي .. عم قول بدك الصراحة وين دخلتني بالتهريب العمى هلأ بيسمعنا شي مخبر وبتودينا بداهيه . !!


- إي لكااان في واحد عنا بيعرض هيك عرض غريب عجيب ..؟ من وين لوين صار في صراحة .؟!!. ولك يخرب بيتك ماحدا عنا بيزرعها ولاحدا بيصنعها ولا بيستوردوها نظامي وأتحداك ..قدامك العالم العربي من المي للمي إذا بتلاقي فيه هيك بضاعة .. بقى من وين جبتها .!!


* هلق بدك يانا نكذب عليك . ؟!


- إي هه ..حلاوتك .. خود راحتك ولايهمك .. هيك العاقلين .. الشاطرين .. الفهمانين بيحكوا . . هيك لاقانون بيطلعلوا معك ولا مخبر بيعرف يكتب شي .. تفضل ترغل واطربنا .


* الله يخلي امواتك بلا مزح خلينا نحكي بجد ..؟


- هلق مين فينا عم يمزح ..؟!!!


* الله يخليك اتركني احكي .


* تفضل .


- نحنا مش أمة عربية ..؟


* لأ


- لكاااان شو نحنا ..؟


* نحن بناديق كل الغزاة وصولا ًإلى مستر سايكس ومسيو بيكو ..؟


- هلق بدك تقنعني انو هيدول لحقوا يخلفوا الكل شو يعني التلقيح يتم بالصورة واللا بالإيحاء واللا / ع السماع .


* لا ولكنه يتم بالاستنساخ .. استنسخوا عنهم آلاف وهيك صار اللي مش معقول ... معقول .


- آآآآه .. فهمت عليك .


* ثانكيو يامان .


- طيب منرجع لموضوعنا .


* أي موضوع خاي . ؟


- قصدي اللي كان بدي إحكيه .


* تفضل بس ماتقوللي صراحة ماصراحة .. الله وكيلك بطلع خارج التغطية بعدين


- طيب مش مفروض أننا جميعا ً عرب ومسلمين ومواطنين أخوة وأهل ..؟


* مفروض .


- طيب ليش عم يعملوا هيك بغزة حصار وضغط ..؟


* مين ..؟


- العرب .


* اختلاف وجهات نظر . !!


- هه هيك رأيك


* بدك الصراحة .؟


- شوووو..!! قبل شوي فقعتني محاضرة عن التهريب شايفك كمان انت عم تتعاطى مع التهريب .!! العمى كيف لو سألتك عن العراق والصومال والسودان .. الخ . الخ .؟


* هيك رأيك .


- بدك الصراحة ..؟


* لأ .. مابتعاطى بالممنوعات .. بس عندي سؤال صغير .


- تفضل إسأل .


* هلق مسيلمة كانوا عندو أولاد كثير ..؟


- العمى ضربك بدك تدخلنا بمجابهة مع مؤتمر القمة .؟ إنت بتعرف شو معنى هيك سؤال .!!!!!!


* لا والله شو معناه ..؟


- معناها ياأخونا بدك تصير مطلوب من الانتر بووووووول بتهمة إرهابي .


* العمى شو هددنا أمن أمريكا .؟


- ألعن ..

* إسرائيل ..؟

- قربت ..لا تكمل كلامك .. هس .. بس ولا كلمة زيادة .